Poesie
Redazione
04 novembre 2018 14:48
Circa 2 minuti per leggerlo
stampa
Marigliano, Chille d' 'o Nuvantanove
Poesia di Vincenzo Cerasuolo
MARIGLIANO - Il poeta Vincenzo Cerasuolo ha voluto commemorare con una bellissima poesia i caduti nella Grande Guerra, che hanno dato la vita per la loro patria e per una società migliore.
Michele faticava zappanno ’a terra;
sul’ ’int’ ’o core suje nce steva ’a guerra.
Gennarino teneva na bella voce;
pe isso ’a vita era assaje doce.
Carmeniello era bello e aitante;
’e ffemmene lle cadeveno tutte quante.
Ereno giuvene: classe novantanove;
’o tiempo cu lloro faceva ancor’ ’e pprove.
’A prova venette nu juorno cu na cartulina:
“Presentateve ’int’ ’a caserma dimane a mmatina”.
’A matina appriesso se ncuntrajene tutt’ ’e ttre,
addimannannese ’e ’sta chiammata ’o ppecché.
“Turnate â casa e ssalutate pate e mmamma:
dimane partite, ’a Patria ve chiamma”.
“Ȃte sentute, guagliù? Jamme, partimme;
facimme vedé ô nemico nuje chi simme”.
Jettene luntane, ’dint’a tterre scanusciute,
ncuntranno surdate cu ffacce e uocchie sperdute.
Purtajene nguerra na ventata d’allerìa
’e chi ancora campava ’e fantasìa;
affruntajene cu ’o pizzo a rriso ’o ffuoco,
pazzianno cu ’a morte comme fosse nu juoco.
…E ’a morte nziem’a lloro se spassaje:
menanno ’a sarrecchia, quante n’acchiappaje!.
Paricchie turnajene â casa dint’a nu tavuto,
ma quaccuno sta ancora llà, pe sempe scanusciuto
Chi salvaje ’a pelle perdette quaccosa ’e cchiù:
dint’a ffuosse e ttrincee nce lassaje ’a giuventù.
Grazie a lloro l’Italia scrivette paggine nove;
’a storia ’e cchiamma chille d’ ’o nuvantanove.
RIPRODUZIONE RISERVATA © Copyright MARIGLIANO.net
venerdì 02 giugno 2023 - Aggiornato alle 00:42
Commenti